ورلڈ کپ کے نتائج بتانے والی بلی سوشل میڈیا وائرل، 27 پیشگوئیاں درست ہونے کا دعویٰ

ڈبلن: فیفا ورلڈ کپ 2026 کے سنسنی خیز مقابلے جہاں دنیا بھر کے فٹبال شائقین کی توجہ کا مرکز بنے ہوئے ہیں، وہیں ایک پالتو بلی بھی سوشل میڈیا پر غیرمعمولی مقبولیت حاصل کر رہی ہے۔ اس بلی کے بارے میں دعویٰ کیا جا رہا ہے کہ اس نے اب تک ٹورنامنٹ کے 31 میں سے 27 میچوں کے نتائج درست انداز میں بتائے ہیں، جس کے بعد اس کی ویڈیوز مختلف سوشل میڈیا پلیٹ فارمز پر تیزی سے وائرل ہو رہی ہیں۔

ورلڈ کپ کے اختتامی مرحلے میں صرف سات میچ باقی رہ گئے ہیں اور دنیا بھر میں شائقین اپنی پسندیدہ ٹیموں کی کامیابی کے لیے پیشگوئیاں اور تجزیے کر رہے ہیں۔ اسی دوران “دی کیٹ” نامی ایک بلی غیر متوقع طور پر خبروں کی زینت بن گئی ہے۔ سوشل میڈیا صارفین اس کی ہر نئی پیشگوئی کا بے چینی سے انتظار کر رہے ہیں جبکہ کئی افراد اسے محض دلچسپ اتفاق قرار دے رہے ہیں۔

رپورٹس کے مطابق “دی کیٹ” چین سے تعلق رکھنے والی لنکا لن اور آئرلینڈ کے رہائشی مارک کی پالتو بلی ہے، جسے دونوں نے 2024 میں گود لیا تھا۔ بلی کے مالکان کے مطابق ابتدا میں انہوں نے صرف تفریح کی غرض سے بلی کے سامنے مقابلہ کرنے والی دو ٹیموں کے جھنڈے رکھے اور یہ دیکھا کہ وہ کس جھنڈے کو پہلے چھوتی ہے۔ اتفاق سے پہلی ہی پیشگوئی درست ثابت ہوئی، جس کے بعد انہوں نے ہر میچ سے قبل یہی طریقہ اپنانا شروع کر دیا۔

لنکا لن کا کہنا ہے کہ وہ اور ان کے شوہر کسی مخصوص فٹبال ٹیم کے حامی نہیں ہیں، اس لیے ہر میچ سے پہلے اپنی بلی سے ممکنہ فاتح ٹیم کا انتخاب کرواتے ہیں اور پھر اسی ٹیم کی حمایت کرتے ہیں، جب بلی کی متعدد پیشگوئیاں مسلسل درست ثابت ہوئیں تو ان کی دلچسپی بھی بڑھتی گئی۔

مالکان کا دعویٰ ہے کہ اب تک بلی نے 31 میں سے 27 میچوں کے نتائج درست بتائے ہیں، جن میں ارجنٹینا کی مصر کے خلاف کامیابی جیسے اہم مقابلے بھی شامل ہیں، اب وہ باقی ماندہ میچوں اور ورلڈ کپ کی فاتح ٹیم کے حوالے سے بھی بلی کی پیشگوئی کے منتظر ہیں۔اگرچہ دی کیٹ کی پیشگوئیوں نے سوشل میڈیا پر لاکھوں صارفین کی توجہ حاصل کی ہے

خیال رہے کہ ماضی میں بھی مختلف عالمی کھیلوں کے مقابلوں کے دوران جانوروں کی جانب سے نتائج کی پیشگوئیوں نے شہرت حاصل کی، ان میں سے کسی بھی دعوے کو سائنسی اعتبار سے ثابت نہیں کیا جا سکا۔