امریکی فوج نے ایران پر فضائی حملے شروع کر دیے

امریکی فوج نے ایران میں نئے فضائی حملوں کا آغاز کر دیا ہے۔

امریکی سینٹرل کمانڈ (سینٹ کام) کے مطابق، کمانڈر اِن چیف کی ہدایت پر امریکی افواج نے ایران کے خلاف مزید کارروائیاں شروع کی ہیں۔ بیان میں کہا گیا ہے کہ ان حملوں کا مقصد آبنائے ہرمز میں جہاز رانی کی آزادی کو خطرے میں ڈالنے کی ایران کی صلاحیت کو مزید محدود کرنا ہے۔

سینٹ کام کے جاری کردہ بیان میں کہا گیا ہے کہ امریکا بین الاقوامی اہمیت کی حامل اس آبی گزرگاہ میں آزادانہ سفر کرنے والے تجارتی جہازوں اور ان کے شہری عملے کے خلاف حالیہ مبینہ بلاجواز کارروائیوں پر ایران کو ذمہ دار ٹھہراتا ہے۔

ایرانی خبر رساں اداروں کے مطابق بندر عباس، سرک، کنارک اور چابہار میں دھماکوں کی آوازیں سنی گئی ہیں، جبکہ ایرانی میڈیا کا کہنا ہے کہ چابہار میں دھماکوں کے بعد بجلی کی فراہمی معطل ہو گئی۔

رپورٹس کے مطابق بوشہر صوبے کے قریب بھی دھماکوں کی اطلاعات ہیں، تاہم امریکی حملے کے باوجود بوشہر کے جوہری پاور پلانٹ کو کوئی نقصان نہیں پہنچا۔

دوسری جانب ایرانی میڈیا نے دعویٰ کیا ہے کہ ایرانی فورسز جلد خطے میں موجود امریکی فوجی اڈوں پر بڑے حملے شروع کریں گی۔