ٹوائلٹ فلش کرنے کا یہ اثر جانتے ہیں؟

اگر آپ کموڈ ٹوائلٹ استعمال کرتے ہیں تو اگلی بار فلش کرنے سے قبل بہتر ہے کہ ڈھکن کو بند کر دیں۔

آسٹریلیا کی فلینڈرز یونیورسٹی کی تحقیق میں دریافت کیا گیا کہ جب ٹوائلٹ میں فلش کو استعمال کیا جاتا ہے بہت بڑی مقدار میں ذرات ٹوائلٹ سے فضا میں خارج ہوتے ہیں جن میں امراض کا باعث بننے والے جراثیم موجود ہوسکتے ہیں۔

درحقیقت یہ ذرات فضا میں 20 سیکنڈ سے زائد عرصے تک معطل رہتے ہیں اور اتنی اوپر ہوتے ہیں جہاں آپ سانس لے رہے ہوتے ہیں۔

اس تحقیق میں 22 تحقیقی رپورٹس کے ڈیٹا کا تجزیہ کیا گیا تھا۔

ان تحقیقی رپورٹس میں یہ جاننے کی کوشش کی گئی تھی کہ ٹوائلٹ میں فلش کرنے سے کس طرح ذرات خارج ہوتے ہیں جبکہ فضائی نمونوں کا جائزہ بھی لیا گیا تھا۔

نتائج سے معلوم ہوا کہ فلش کرنے پر فضا میں ننھے ذرات پھیلتے ہیں جو انسانی آنکھ کو نظر نہیں آتے۔

ایک بار جب یہ ذرات خارج ہوتے ہیں تو کچھ وقت تک فضا میں رہتے ہیں۔

فضا میں رہنے کے نتیجے میں ان ذرات میں جراثیموں کا اجتماع ہونے لگتا ہے اور سانس کے ذریعے جسم کے اندر جاسکتے ہیں۔

جب یہ نظام تنفس کی نالی میں پہنچتے ہیں تو پھر امراض سے متاثر ہونے کا خطرہ بڑھتا ہے۔

محققین نے بتایا کہ اس حوالے سے مزید تحقیقی کام کی ضرورت ہے مگر یہ ضرور واضح ہوتا ہے کہ ٹوائلٹ فلش کو استعمال کرنے سے قبل کموڈ کا ڈھکن بند کر دینا چاہیے۔

انہوں نے مزید بتایا کہ ایسا کرنے سے ذرات کا پھیلاؤ گھٹ جاتا ہے جبکہ ٹوائلٹ میں ہوا کی نکاسی کا نظام ہونا بھی ضروری ہے۔

ان کا کہنا تھا کہ احتیاطی تدابیر سے مختلف امراض سے بچنے میں مدد مل سکتی ہے۔

اس تحقیق کے نتائج جرنل سائنس آف دی ٹوٹل انوائرمنٹ میں شائع ہوئے۔