جبوتی کے ساحل پر تارکینِ وطن کی کشتی ڈوب گئی، 109 افراد ہلاک

جبوتی کے ساحل کے قریب تارکینِ وطن کو لے جانے والی کشتی حادثے کا شکار ہوکر ڈوب گئی، جس کے نتیجے میں کم از کم 109 افراد ہلاک ہوگئے جبکہ تقریباً 116 افراد تاحال لاپتہ ہیں، ہلاک ہونے والوں میں 15 بچے بھی شامل ہیں۔

غیر ملکی خبر رساں ویب سائٹ کی رپورٹ کے مطابق کشتی میں سوار افراد کی تعداد 350 کے قریب تھی اور وہ جبوتی سے یمن کی جانب سفر کر رہے تھے۔ زندہ بچ جانے والوں نے امدادی حکام کو بتایا کہ کشتی جبوتی کے قصبے اوبوک کے شمال میں الٹ گئی، جس کے بعد متعدد افراد سمندر میں ڈوب گئے۔

جبوتی میں بین الاقوامی ادارہ برائے مہاجرت کے مشن چیف الیگزینڈر کوئساک نے اس حادثے کو انسانی جانوں کا انتہائی افسوس ناک نقصان قرار دیا۔ انہوں نے کہا کہ اس سانحے میں اپنے پیاروں کو کھونے والے خاندانوں اور زندہ بچ جانے والوں کے دکھ میں ادارہ برابر کا شریک ہے۔

الیگزینڈر کوئساک کا کہنا تھا کہ متعدد خاندان اب بھی اپنے لاپتہ رشتہ داروں کے بارے میں معلومات ملنے کے منتظر ہیں، جو ان کے لیے شدید پریشانی اور کرب کا باعث ہے۔

انہوں نے مزید بتایا کہ حادثے کے بعد امدادی ٹیمیں جبوتی کے حکام کے ساتھ مل کر جائے وقوعہ پر موجود ہیں اور متاثرہ افراد کو ہنگامی امداد فراہم کی جا رہی ہے، حکام کی جانب سے لاپتہ افراد کے بارے میں معلومات حاصل کرنے اور متاثرین کی مدد کے لیے کوششیں جاری ہیں۔